Ons leef in ’n era van ekologiese ontwaking én krisis. Klimaatsverandering, droogtes, ontbossing, besoedeling en die verlies aan biodiversiteit is nie meer verre nuus nie — dis deel van ons daaglikse werklikheid. Maar binne hierdie wêreldwye uitdaging skuil ook hoop: gemeenskappe wat veg vir regverdigheid, jong mense wat hul stemme laat hoor, wetenskaplikes wat oplossings bied. Wat ons nou nodig het, is joernaliste wat die vermoë het om dié komplekse, dringende en dikwels emosionele stories met insig, deernis en geloofwaardigheid te vertel.

Hierdie kursus in omgewingsjoernalistiek leer jou om met kritiese denke en nuuskierigheid navorsing te doen, wetenskaplike feite in verstaanbare, boeiende taal te vertolk, die menslike stories agter die statistiek te vind,en komplekse omgewingskwessies kontekstueel, eties en met trefkrag te dek.

Of jy nou ’n aspirant-joernalis, 'n skrywer met ’n groen hart, ’n student of ’n aktivis is — hierdie kursus gee jou die gereedskap om jou stem te laat hoor en ’n verskil te maak. Jy leer hoe om nie net oor probleme te skryf nie, maar om oplossings, hoop en aksie te kommunikeer.

Skryf met verantwoordelikheid. Skryf met kennis. Skryf vir die toekoms. Word ’n stem vir die omgewing.

Toelatingsvereistes

• Bewese vorige joernalistieke ondervinding of voltooiing van 'n joernalistieke kursus

• Goeie skryfvaardighede

• Rekenaargeletterdheid, e-pos en internettoegang

• Geen vorige tersiêre kwalifikasie word benodig nie

Slaagvereistes

Minstens 65% en minstens EEN persklaar omgewingsartikel