Welkom by SA Vryskutskrywer - V & A: Hoe werk ons kursusse?
Aanlynstudies raak wêreldwyd ál meer gewild weens hulle bekostigbaarheid, gerief en persoonlike opleidingsmetodes. Ons kursusse word spesifiek ontwerp met hierdie kenmerke in gedagte. Alles wat ons aanbied is prakties, professioneel en op die man af. SA Vryskutskrywer se opleiers is spesiaal toegerus om jou vanaf bladsy een te help om jou eie skryfstyl te vind en te ontwikkel. In ons intense een-tot-een opleidingstelsel is jy nie net 'n student nie, maar 'n mede-skrywer. Onder volg ‘n paar vrae wat gereeld deur voornemende studente gevra word, met ons antwoorde daarby. Indien jy na dese nog enige navrae het, moenie huiwer om ons te kontak om klarigheid te kry nie.
Wat presies behels aanlynstudies?
‘n Aanlynkursus is soortgelyk aan ‘n korrespondensiekursus met die verskil dat alle kursusmateriaal (kursusnotas en terugvoering van jou opleier) via e-pos gestuur word in plaas van slakkepos soos in die goeie ou dae.
Hoe werk SA Vryskutskrywer se kursusse?
Soos reeds gesê, alle kursusse en kommunikasie word deur middel van die internet gedoen. Wanneer jy vir ‘n kursus registreer en die toepaslike kursusfooi* ten volle betaal het, word jou kursusmateriaal dadelik aan jou gestuur, sowel as ‘n verwelkomingbrief van jou persoonlike opleier. Jy kan dus sommer dadelik aan die werk spring. (*Kyk onder by Hoe betaal ek die kursusfooie? vir besonderhede.)
Wat maak SA Vryskutskrywer se kursusse anders as ander instansies s’n?
-
Na voltooiing van jou kursus sal jy 'n portfolio kan toon met minstens een publiseerbare storie, afhangende van die kursus waarvoor jy ingeskryf het. Die meeste joernalistieke kursusse maak voorsiening vir minstens twee persklaar-artikels. Vir meer besonderhede en ook wat jy van 'n kursus kan verwag, bestudeer die kursus van jou keuse se volledige kursusbesonderhede.
-
Ons bied géén kursusse in ‘n groepsomgewing aan nie. ‘n Persoonlike opleier – en kenner op sy en haar vakgebied – word aan elke ingeskrewe student toegewys. Jy werk dan saam met dié persoonlike opleier op ‘n een-tot-een basis wat volledige terugvoering vir alle werkopdragte en proefstukke insluit.
-
Elke student kry persoonlike aandag en terugvoering van die opleiers en enige kommunikasie tussen die student en opleier is heeltemal privaat.
-
Ons kursusse is pret, hoewel baie leersaam. Teorie word tot die minimum beperk want ons glo aan die skrywersgesegde, “Wys my, moenie my vertel nie”. Ons WYS jou eerder hoe om te skryf deur skryfoefeninge wat jy self moet voltooi en instuur vir evaluering deur jou opleier.
-
Ons glo daaraan dat jy nie ‘n voornemende skrywer kan leer skryf as hy nie self oefening kry nie. Ons kursusse bevat dus verskeie skryfoefeninge wat jou help om jou skryfstyl te slyp.
-
Ons hou NIKS terug nie. Ons deel al ons kennis met jou. Sommige van ons opleiers het meer as 35 jaar ondervinding in hulle onderskeie skryfgenre en deel elke greintjie inligting wat hulle met bloedsweet deur die jare versamel het, met jou. Ons vertel jou regtig ALLES wat jy moet weet om ‘n suksesvolle skrywer in jou gekose rigting te word.
-
Ons nasorg is buitengewoon goed aangesien jou persoonlike opleier altyd ná voltooiing van jou kursus beskikbaar is om jou van advies te bedien, sou jy dit benodig.
-
Omdat ons kursusse so intens en deeglik is, stap jy na voltooiing weg met ‘n persklaar stuk of twee wat jy aan die mark van jou keuse vir publikasie kan voorlê.
-
Jy word op ‘n persoonlike vlak deur van die beste skrywers in die land geleer presies hoe om jou skryftegniek te ontwikkel en/of te vervolmaak.
Wat is die toelatingsvereistes?
-
Omdat ons hoofdoel by SA Vryskutskrywer is om Afrikaans 'n hupstoot te gee, keur ons elke individuele aansoek. Ons wil hê dat elkeen van ons oud-studente ten volle vir 'n loopbaan in vryskutskryf toegerus moet wees. Ons aanvaar dus nie elkeen wat aansoek doen nie, omdat sommige mense werklik nie die vermoë het om te skryf nie, en dis nie iets wat jy so iemand kan aanleer nie. Derhalwe wil ons ook nie so 'n persoon se geld neem as ons wéét hy sal die pyp nie kan rook nie.
-
Geredelike internettoegang en rekenaargeletterdheid is noodsaaklik omdat al ons kursusse deur middel van e-pos aangebied word.
-
Ons verwag ook dat jy, as voornemende skrywer, die basiese skryftegnieke soos grammatika en taalstyle reeds onder die knie sal hê. Aan hierdie kant evalueer ons jou aansoek om seker te maak dat jy wel skrywersmateriaal is, want ons grootste doelwit is om te help om nuwe Afrikaanse skrywers te ontwikkel, en wil nie enigiemand laat betaal vir ‘n kursus wat ons weet nie werklik benut kan word nie.
-
Sommige van ons omvattende kursusse, soos ons romankursusse, vereis ‘n gedeelte van die roman se eerste hoofstuk, asook ‘n sinopsis van die res van die verhaal vir evaluering voordat jy tot die kursus toegelaat kan word.
-
Die enigste ander vereistes wat jy nog benodig om vir ‘n kursus in te skryf is deursettingsvermoë, belangstelling in skryfwerk en die ywer om te verseker dat jy in die mededingende wêreld van vryskutskryfwerk ‘n sukses sal kan wees.
Wanneer kan ek vir ‘n kursus registreer?
Omdat ons 'n aanlynkollege bedryf, kan jy enige tyd vanaf die middel van Januarie tot en met die einde van November vir 'n kursus inskryf. Ons aanvaar nie nuwe registrasies tydens Desember nie omdat die somervakansie wat in hierdie tydperk val, alles omver gooi en min mense is in staat om gedurende daardie kuiertyd van die jaar te kan werk.
Hoe en waar registreer ek en wat gebeur na registrasie?
Klik op die registrasieblad-skakel wat op elke kursusleerplanblad is of, as jy reeds voor die tyd besluit het vir watter kursus jy wil inskryf, kan jy net op die KURSUSREGISTRASIE-skakel klik en die aanlynregistrasievorm voltooi. Ons sal binne 24 uur op jou registrasie-aansoek antwoord en indien jy ons vaardigheidstoets geslaag het, sal ons jou faktuur met die kursusfooi per e-pos aanstuur. Jou verwelkomingsbrief en toewysing aan jou persoonlike opleier en kursusmateriaal volg kort daarna.
Hoe betaal ek die kursusfooie?
-
Vir kursusse onder R2 500 is kursusfooie ten volle by registrasie betaalbaar. Slegs nadat kursusfooie ontvang is, sal die kursusmateriaal uitgestuur word.
-
Duurder kursusse, soos byvoorbeeld die omvattende- of romankursusse, kan in twee paaiemente van 60% vir 'n deposito en 40% vir die res, in twee maande afbetaal word indien jy dit verkies. Dui dit net op die aansoekvorm aan.
-
Diegene wat verkies om die volledige kursusfooi by registrasie te betaal - selfs vir kursusse wat in aanmerking kom vir tweeledige betalingsopsies - kry 10% afslag.
-
Jy kan die fooie deur middel van ‘n elektroniese bankoordrag, tjekdeposito of kontantdeposito by die bank inbetaal.
-
Alle nodige inligting is op die faktuur wat jy van SA Vryskutskrywer sal ontvang.
Watter baat sal ek by SA Vryskutskrywer se kursusse vind?
-
Ons leer jou alles wat jy nodig het om jou toe te rus om op jou eie die vryskutskryfmark te betree. Hierby ingesluit is ook basiese besigheidswenke want die enigste manier hoe jy werklik suksesvol as vryskutskrywer of -joernalis kan wees, is as jy jou werk soos 'n volwaardige besigheid benader. En ons wys jou presies hoe om te begin en verder te werk te gaan.
-
Van die aspekte waarop ons konsentreer is die Afrikaanse media-industrie self, ingeligde wenke oor tydskrifte, koerante en uitgewers wat nêrens anders in Afrikaans te vinde is nie, hoe om jou werk te verkoop, waar om idees te kry en hoe om hulle na te vors totdat die finale produk uit jou pen verskyn. Ander kwessies soos kopiereg, plagiaat, belasting, besigheidswenke en markte waar jy jou werk gepubliseer kan kry, word ook gedek. Kortom, as daar enige aspek van vryskutskryf is wat ons níé in ons kursusse dek nie, is dit heel moontlik nie die moeite werd om te weet nie!
-
Na voltooiing van jou kursus stap jy weg met 'n grondige kennis van dít waarvoor jy ingeskryf het, sowel as die begin van 'n portfolio wat hopelik vinnig sal uitbrei.
Is SA Vryskutskrywer se kursusse geakkrediteer?
Nee, maar ons reik ‘n Sertifikaat van Voltooiing uit as al die vereistes vir ‘n betrokke kursus nagekom is en ons help jou om jou eerste treë op jou vryskutpad te gee. Ons bied ook volledige na-kursus ondersteuning.
Aan watter vereistes moet ek voldoen om 'n Sertifikaat van Voltooiing te verwerf?
-
Ons standaard is hoog – vir beide kursusopleiers sowel as studente – en ‘n slaagsyfer van minstens 65% sal verseker dat jy ná voltooiing van die kursus werklik toegerus is om die opwindende en uitdagende wêreld van vryskutskryf aan te pak. Om ‘n laer slaagsyfer te vereis is soos om ‘n soldaat sonder sy geweer oorlog toe te stuur of 'n dokter wat sy kursus gedruip het, in 'n operasieteater los te laat.
-
Elke kursus het ‘n tydsbeperking en jy móét binne die gegewe tydsbeperking al jou werkopdragte voltooi en instuur, anders verbeur jy jou Sertifikaat van Voltooiing. Geen uitstel word verleen nie, tensy daar werklik ‘n baie goeie rede voor is en ook net mits daar betyds aansoek gedoen is.
-
Indien daar enigiets is waaroor jy nog onduidelikheid het, stuur asseblief vir ons jou navraag deur middel van onderstaande aanlynvorm.
